افتونیوز ؛مجید تقی زاده شاعر معروف هم استانی همدردی خود را به در گذشت ایل خان چرام «جان محمد خان چرامی» در قالب قطعه شعری این‌چنین به نمایش گذاشت:

وَ غم وَیسانه بیدَل الغچین بَی رو تغار اُمرو

وَ موگر تا بناری پُر وَ ایل غم وَ بار امرو

تغار و کورسا سیر ایگریوِن کورکور امرو

کُرُک کر کرده زر سایه وَغم چی کوگپور امرو

و سایَی خَیز تا خومی کَس از غم برحذر نیسی

جمَی سِه کرده کٓه سِه و  کمر دم پاکمر نیسی

دنا تا ماغره غر وَهگرهته شوکش ایخونه

و داغی خان خوبو ایلی یَه آه و غریفونه

سوار سردیار چاسخار و نیر و اشکر بی

یه فرمانداری کل بی و یه یَل هم کلانتر بی

یه لت زر آسمون کهگلو کُِه بی ستینی بی

یه لت انگشتر عمران ای خاکه نگینی بی

و روز بزم سر زین ادب شانومه خونی بی

و روز رزم خان سرخن سوار شالَه زونی بی

یه رو مرز طسوج و سرحده سرلشکری ایکه

یه رو وا خواهش و تدبیر دانش پروری ایکه

و یمن اعتبارش اعتبار ای دیاره ایخواس

حق ای اَو و خاکه خان وَ روز و روزگار ایخواس

و تهرون تَی خودِ«آموزگار» آموزگار آوِه

سپاه دانش و بهداشته سیمو و وار آوه

درختل چشمه بلقیسه و دزفول و کرج آوه

بهشتی  تا ابد سوزینه ویچه رَج و رج آوه

اگر آمرو نگین سوزیه ای خاکهَ ای خانه

لقب خان چرومَه من همی استان درخشانه

کلانتر ایلمو امرو و دیدار ککاش ایره

اجل نیبینه که دِهلَل یه ایلی پا و پاش ایره

نِشَس خان تَی  کَکی خانش همو خان اول خانش

همو خانی که چی رُهسَم چه خَش تا کِه و هف خوانش

همو خان منش دارش که حکمش زِروَری ایکه

چه کُه من کهگلوبیراحمد عمری سروری ایکه

همو خانی که سی ای خاک عمری خیرخواهی داشت

مث کوروش من  بابٕل و دهلل پادشاهی داشت

همو خانی که آبادی دم اسمش گره خرده

همو خانی که سی ای خاک مثلش دَ نیرگرده

بگر خاک چرومه من بغل گرم ای دوتا خوبه

بگر من سینه چی گنج ای دوتا شمش طلاکوبه